Historie des BNA

De BNA stellt sick vör!

Tau de vierundörtigjährig Geschicht von den´n „Bund Niederdeutscher Autoren“.

För vierundörtig Johr, an´n 22. Februar 1990, is de „Bund Niederdeutscher Autoren“ (BNA) – för Mäckelburg – Vörpommern un de Uckermark – gründ worden un wier dormit de ierste nå de Wend niech gründ Plattdüütsch – Verein in uns´Bundesland.

De Idee ein Plattschriewerbund in´t Läben tau raupen, harr Gerhard Diekelmann ut Verchen.
Gerhard Diekelmann füng all 1946 mit de plattdüütsche Schriewerie an. De kreech em mit de Tiet so tau fåten, dat hei 1979 sien Daun as Fischer an´n berühmten Nagel hängen de un statt mit Netten un Boot nu mit Bliefedder un Popier tau Wark gåhen ded. Af 1990 nömmte hei sick denn „Freier Schriftsteller“. Wat hei ut sien niech Handwarkstüüch måken de har Hand un Faut. Sien Bäuker sünd fix vergräpen. De Ursack dorför licht up de Hand – Gerhard Diekelmann schreef œwer Minschen, de üm em rüm läben deden. Wat hei den´n Läser an Riemel un Verteller anbeiden de, wier nich ut de Luft gräpen, sunnern har ümmer ein reale Grundlach.

Tau so ein Schriewer harn anner Autoren vertrugen. So künn´ hei ball de Plattschriewers von sien Idee, ein plattdüütschen Schriewerbund tau grünnen, œwertügen. As hei 1990 den´n BNA in de Welt raupen de, setten all acht Autoren mit an´n Disch. Tau de ierste Johreshauptversammlung, de an´n 01. September 1990 up de Tetrowsch Burgwallinsel afhollen würd, keemen all 22 Mitglieder. Dorbi wieren solch namhafte Autoren as Ilse Klezin (Ueckermünn), Günter Schmedemann (Templin), Jürgen Pump (Kirchhof, Insel Poel), August Wulff (Groß Godens), Heinz Panzier (Rostock), Ilse Mühlbach (Doberan), Karl- Hermann Fink (Laage).

Dat Protokoll von disse Jahreshauptversammlung gifft uns Utkunft wecker Mitglieder in den´n iersten BNA- Vörstand wählt worden sünd: Gerhard Diekelmann (Verchen) – Vörsitter, Heinz Vollmann (Dargun) – Schatzmeister un Ernst Grüttmüller (Neubrandenburg) – Organisation. Un kein annern as Erna-Taege Rönisch ut Templin, de tau de Gründungsmitglieder von´n BNA hürte, is dunnmals as Ehrenvörsitterin von den´n niegen Schriewersbund wählt worden. Beschlotten würd in´n September 1990 uk de Satzung un domit würden uk de Upgaben fastschräben:

„Die zukünftige Arbeit des Bundes muss sein, Kurzgeschichten, Gedichte und andere Prosaarbeiten in Niederdeutsch zur Bereicherung und Pflege der niederdeutschen Sprache beizutragen. Geplant ist später die Herausgabe einer Anthologie.“

Dormit wier dat Ziel in´t Og fåt. Wenn uk bet hüt af un an eis an´t Visier dreicht worden is, üm de ein orrer anner Såk bäder in´n Focus tau kriegen, de Leitlinie von 1990 is ümmer Grundsatz von´n BNA bläben. All 1991 künn´n de BNA – Schriewerslüd dat ierst Bauk, von ehr Anthologie, de „Plattdüütsch Blaumen“, rutgäben. Dor œwer het sick besunners Gerhard Diekelmann freugt. Man Koppweihdach hett em dat uk inbröcht, denn hei müsst för den´n Druck 9.000,00 DM upbringen. Hei har dat Geld tausammenkrägen, denn as Vörsitter wier hei rührig. Hei har nich blott Sponsoren funnen, hei har uk mihr Autoren in den´n Bund halt un nå Bauk I uk de Bäuker II bet V würden unner sien Regie verlecht. Gerhard Diekelmann knüpte uk Kontakte tau den´n Landesheimatverband Mäkelburg – Vörpommern, tau anner Schriewerkrinks, Gesellschaften un tau de regionalen Medien. De Gründungsversammlung up de Burgwallinsel bi Teterow fünnen tau Dickelmanns Amtstieden BNA Johres- un Wahlversammlungen in Dargun, Güstrow, Rostock, Stavenhagen, Plau an´n See un up den´n Pingelhoff bi Parchen statt.

Wi hemm´ Gerhard Diekelmann väl tau verdanken. Natürlich stünn´ em up de Brügg gaude Stüerlüd tau Siet, awer de Kaptein wier hei teihn Johr, von 1990 bet 2000.

In´t Johr 2000 müsst Gerhard Diekelmann, wieldat sien Gesundheit nich mihr mitspälen ded, den´n Vörsitterposten afgäben. Un as dat sien Ort wier, hett hei dat mit Ümsicht dan, un soans is dat den´n niegen Vörsitter nich schwor follen de Geschäfte tau œwernähmen. De Mitglieder wählten Wolfgang Mahnke (Rostock), de mit Dieter Lockenvitz (Berlin) Stellverträder un Apporten, Edeltraut Richter (Trittelvitz) Schatzmeisterin, Heidelinde Wulff (Rostock) Protokoll un Helmut Hillmann (Ueckermünde) Archiv, von 2000 bet 2012 den´n BNA Vörstand. Mit Wolfgang Mahnke is de Sitz von´n „Bund Niederdeutsch Autoren“ e.V. ut Verchen in de Hansestadt Rostock halt worden. Mit väl Anstrengungen hett de niege Vörstand ´n por niege Ideen ümsett´. All Maten hemm´ düchtig för ehren Bund worben, so dat ball tweiundörtig Autoren mit in´t Schriewersboot seten. Mit de Tausammenarbeit von Anna-Margarete Zdrenka un Joachim Meier, de as Lektoren vör den´n BNA tätig würden sowie uk de Illustrator Uwe Gloede, har de Qualität un dat Utseihn von de „Plattdüütsch Blaumen“, Bauk VI – X, ein högeren Stand funnen. So hett Mahnke in sien Amtstiet de Autorenläsung unner den´n Titel, „Dat plattdüütsche Sextett“ inführt. Söss BNA-Autoren deden ehre Bäuker up Johres- un Wahlveranstaltungen vörstellen. Dorbi wür för´n BNA orrig Werbung måkt, Den´n in den´n´ Rundfunk un in de Tiedings wier tau läsen, wur dat „Plattdüütsche Sextett“ sien Uptritt harr orrer wur in uns´ Land de Schriewerbund grad Tagen de un dat dor tau ein öffentlich Läsung BNA-Autoren sick mit ehre Texte vörstellen deden. An´n Sünndach, tau de Tagungen, fünn´n Exkursionen statt. Dorbi güng´t ümmer üm besondern Urte, de ein Bezug tau dat nedderdüütsche Läben harn. Wiel ut Öllersgrünn ümmer mihr Mitglieder nich mihr up solange Reisen gåhn künnen sünd de Tagungen, mit Œwernachtung un Utflug, instellt worden. De BNA-Autoren keemen twors noch einmal in Niegenbramborg un Teterow tausamen, awer dornå würden de Tagungen ümmer in´t Fritz-Reuter-Literaturmuseum in Stemhagen afhollen. Dat ´Plattdüütsche Sextett` hat nå fief Johr utdeihnt. Doch ein Relikt ut disse Tiet hürt bet hüt tau BNA-Versammlungen, de öffentliche Läsung.

As Mahnkes Nahfolger würd 2021 Dr. Behrend Böckmann (Kirch-Rosin) wählt.
2013 läd Dr. Böckmann sien Amt as Vörsitter dal un künndigte uk sien Mitgliedschaft in´n BNA up.

Von 2014 bet 2018 hett Dr. Jürgen Rogge (Perleberg – Lübzow) as BNA-Vörsitter fungiert. Uk in´n Vörstand har sick wat ännert. Bernd Lubs (Niegenbramborg) wier sien Stellverträder, Dieter Lockenvitz (Berlin) œwernähm de Protokollarbeit un de Apporten, Edeltraut Richter (Trittelvitz) wier de Schatzmeisterin un Helmut Hillmann (Uekermünn) wier för´t Archiv tauständig.
Dr. Rogge un de Vörstand harn dat niege Statut verbindlich måkt. Uk de Verbindungen tau alte un niech Verein´n, besunners tau de Gillhoff-Gesellschaft, würden faster knüppt. De Sitz von´n BNA würd nu nå Perleberg-Lübzow verleecht un in´t Vereinsregister in Neuruppin indragen. Mit de Publikation von de „Plattdüütsch Blaumem“, Bauk XI, XII un XIII, hett Dr. Rogge de BNA- Tradition wohrt un den´n Schriewersbund up Kurs hollen.

Siet 2018 is Bernd Lubs (Niegenbramborg) de Vörsitter von´n BNA. Uk de Vörstand hett niege Mitstreiter. Solang dat noch güng, wier Dr. Rogge de Stellverteter. Nå sien Utscheiden, is Wilfried Rachow (Gneven) tau den´n Stellvertreter worden. Leider müsst hei awer uk all den´n Posten upgäben. Norbert Schröder (Damerow) œwernähm de Funktion as Kassenwart, Hanns-Eckard Sternberg (Schönwalde) führt von nu an den´n Schriftführerposten wirrer un is uk för de Apporten verantwurtlich. Johannes Güssmer (Jabel bi Waren/Müritz) is de niech Archivar.

Von dunn an hett sick dat Vereinsläben orrig in uns´ Bund ännert un twors taun´n Vördeil vör alle Maten. So hett de niege Vörstand as Ierst sien „Gesellenstück“, de niech Anthologie, Bauk XIV, tau dat dörtigjährig Bestehen von´n den´n BNA, as Jubiläumsband veröffentlicht. Dat Besunners doran – alle Schriewerslüd, de eis Måten in uns´Bund wiern, un noch sünd, hemm sick in dat Bauk för ümmer verewigt.
Mit väl Kraasch un gaude Ideen hett de niege Vörstand den´n Bund tau noch mihr positive Wirkung un grötteres Anseihn verholpen. Nich blot dat de „Plattdüütsch Blaumen“ nu all bet tau Bauk XVI führt worden sünd. De Vörstand hett uk dorvör sorcht, dat de Måten för den´n Druck nu nichmihr in ehr Portemonai langen un uk zwangswies teihn Bäuker afnähmen möten. Uk de Apporten hemm´ ein anner Bild krägen. Ut dat ehemalig Mitteilungsblatt is ein anspruchsvolle Hochglanzzeitschrift, mit ein breitgefächert, unnerhaltsamen Inhalt worden. Se kost´ nicks un jedein von uns Maten kann sick dor mit inbringen. De verantwurtliche Redakteur, Hanns-Eckard Sternberg, erntet berechticht grod Lob und Anerkennung för siene aufopferungsreiche Arbeit. Ümmer mihr Lüd, un dat nich blot in MV, interessieren sick för uns´ Blatt. So is de Uplach all up 170 Zeitungen anstägen. In´n Übrigen sünd de Apporten de einzigst Zeitung, de in Plattdüütsch erscheinen deit.

Willdat de Vörstand un väl von uns Måten den´n Kontakt tau Lüd säuken, de sick uk för de plattdüütsche Schriewerie interessieren, is de Mitgliederzahl nu up 40 Måten stägen. So hemm´ all mihr junge Lüd, as öllere Plattschriewers den´n Wech tau uns Bund funnen. De niege Vörstand is åpen tau Minschen mit Behinderung. So hemm´ wi twei blinde Schriewer in uns Reich upnåhmen. Günter Weitendorf (Barnekow) un Marco Höster (Rostock) beteiligen sick ümmer mit ehre Texte an de „Plattdüütsch Blaumen“ un de Apporten, de se sick up ein Stick anhüren können, de von Hanns-Eckard Sternberg œwerdragen ward. Dor, wurd för se mœglich is, kåmen se uk tau uns Dräpen un fäuhlen sick woll twischen ´Iherglicken´ sien tau können.

Uk Muskanten hemm´ den´n Wech tau uns´ funnen. Ronald Freude (Waren/Müritz) un Daniel Wahl (Neu Schloen) schriewen ehre Texte sülben, wie uk de Musik dortau. Lars Engelbrecht (Neuenkirchen), is dörch sien Comics bekannt worden. Hei is sogaut, dat em sogor ein internationale Utteiknung för de beste Arbeit tauerkannt worden is. Appropos Musik – De BNA har uk ein Tietlang ein egen Radiosendung, de unner de jetzige Führung upbucht wür. Leeder fählen uns de Lüd, üm ein rägelmässig Sendebetrieb mit junge Plattmusik vör junge Minschen antaubeiden.

Siet twei Johren gåhn uk wedder de Johreshauptversammlungen œwer´t Wochenend. So wür vörrig Johr ein kommodig Sünnabend un Sünndach in Warenshof an de Müritz afhollen. Dit Johr find uns´ Dräpen von Friedach bet Sünndach up ein Ferienburnhoff up Ummanz statt.

Awer nocheis trööch, tau uns´ Anthologie, de „Plattdüütsch Blaumen.“ De „Plattdüütsch Blaumen“ sünd ümmer dat Paradepierd un Uthängeschild von´n BNA wäst. Dormit de Bäuker ok ein anspräkend Utseihn hemm´, leggen de verantwuurtlichen Lüd groden Wiert up dat Utseihn. All dat ierste Bauk is mit Schierenschnitte von Anneliese Hoffmann (Horst) illustiert. De Vignetten in Bauk II stammen von Karl- Hermann Fink (Laage). Mit Teiknungen von Annemarie Röpke (Insel Poel) schmückt sick dat Bauk III. Bauk IV hemm´ Annemarie Röpke un Karl-Hermann Fink mit Teiknungen verseihn. In Bauk V bet Bauk VII sünd wedder Schierenschnitte tau finn´, dissmal von Rosel Pantzier (Templin). Tau Freud von de Autoren un Läser hemm´ all de Schierenschnitte, Vignetten un Teiknungen ümmer ein Betog tau de Riemels orrer Vertellers. Von Bauk I bet V hemm´ de Vörstandsmitglieder de einzelnen Bidräg utwählt, un wenn´t nödig wier, uk Korrekturen vörschlagen. Üm den´n Vörstand bi disse Arbeit tau entlasten, hemm´ sick von 1998 de Lektoren Anna-Margarete Zdrenka un Joachim Meier verantwuurtlich fäuhlt. Se stünnen ümmer mit Rat un Tat un ehr sihr gaudet Fachwissen jedein Autor tau Siet.

De Schriewersbund kann up sien Anthologie, dat sünd bet hüt œwer 2.500 Sieden plattdüütsche Literatur, tau Recht stolt sin. Alle twei Johr ein niech Bauk ruttaugäben, dat hett bether kein anner plattdüütschverein in MäkelborgVörpommern farig krägen! So sall awer uk secht warden, dat ahn de finanziellen Tauschüsse von´t Kultusministerium in Schwerin, den´n Heimatverband MV, de Ehrenamtsstiftung Güstrow, de Stiftung Mäkelborg mit Sitz in Schwerin, de Förderverein Reutermuseum in Stemhagen un dat Volkskulturinstitut in Rostock, wier disse Leistung woll nich möglich wäst. De BNA konzentriert sick awer nich blot up sien Anthologie, hei hett väle Verbinnungen tau anner Vereine orrer Institutionen. So tau den´n ollen un niegen Heimatverband Mäkelborg-Vörpommern, tau dat Fritz-Reuter-Literaturmuseum in Stemhagen, de Fritz-Reuter-Gesellschaft in Niegenbramborg, de Johannes-Gillhoff-Gesellschaft in Glaisin un natürlich tau de Verlagshüser von Schriften un Bläder, de plattdüütsche Schriften drucken daun. Väl Maten schrieben för regionale Zeitschriften un Heimathefte.

Uk bi all de groden Platt-Events, as de „Reuter-Festspiele“ in Stemhagen orrer de „Norddeutschen Tage an der Elbe“ in Döms, måken de Schriewerslüd von uns´ Bund nich blot mit, se gäben uk teilwies den´n Ton mit an. Dortau kåmen noch Johr för Johr landup, landaf väle plattdüütsche Vörstellungen. För de hoge Qualität von ehr Vertellers, Riemels un Bäuker un för de grode Mäuh un flietige Arbeit bi de Plääch von uns´ Mudderspråk, hemm´ väl BNA-Maten Priese un Utteikungen krägen. Babenan Ilse Mühlbach, de 2009 för ehr plattdüütsches Läbenswark mit dat „Bundesverdienstkreuz“ ihrt wür, Erna Taege Rönisch, de 1992 mit den´n Hamburger „Fritz-Reuter-Preis“ utteikend worden is. Den´n „Fritz-Reuter-Literaturpreis“ wür 2003 an Wolfgang Mahnke, 2008 an Dietrich Sabban, un 2009 an Heinz Pantziert verliehen. Den´n „Johann-Gillhoff-Preis“ kregen 2008 Karl-Heinz Madauss, 2010 Dr. Jürgen Rogge, 2013 Dietrich Sabban, 2014 Jürgen Pump un 2018 Wolfgang Mahnke. Mit den´n Lannesspråkpries von Mäkelborg-Vörpommern wür 2017 Wolfgang Mahnke utteikend. Besunners Stolt sünd de Schriewerslüd von´n BNA dor up, dat se 2011 mit den´n „Fritz-Reuter-Literaturpreis“ utteikend worden sünd un twors för Bauk X, von de „Plattdüttsch-Blaumen“, dat up Fritz Reuter sien 200. Geburtstag tauschnäden würd.

Uns´ Plattschriewerbund is up ein gauden Wech un stüert ball up dat neechst Jubiläum tau! Wurher nähm wi disse Gewissheit? Wi harn un hemm´ in uns´ Bund gaude Vörsitter, Vörstandsmitglieder un kreativ un flietig Autoren un väl engagiert Lüd, up dessen Ünnerstüttung wi uns ümmer verlåten können. Wi könn´n mit Stolt un Freud up vierundörig Johr BNA trüüchblicken. Awer uk Weihmäudigkeit schliekt sick mit in, denn männigein von uns´ Autoren, mit de wi ein gaudet Wechstück tausåmen gåhn sünd, hemm´ ehr Schrieftüüch för ümmer bisiet lecht. Dat se in dat Jubiläumsbauk XIV noch eis tau Wuurt kåmen sünd, hemm´wi den´n jetzigen Vörstand tau verdanken. So warn wi se ümmer in gaude Erinnerung behollen!

De vierundörtig Johr Bund Nedderdüütscher Autoren sünd ein Erfolgsgeschicht, wieldat kuraschiert un kreative Schriewerslüd dat BNA-Stüerrad ümmer fast in ehre Hännen hollen, dat plattdüütsche Kulturarw in Ihren hollen un mit niech Literatur dorför sorgen, dat Plattdüttsch in uns´ Land uk taukünftig ein wichtig Kulturgaut blieben deit.

Bernd Lubs
Vörsitter BNA e.V.

Anmårken will ick noch, dat uns´ Ehrenvörsitter, Wolfgang Mahnke, väl Vörarbeit leistet hett, åhn dessen Wissen disse Angaben nich so Aufschlussreich wiern.