Historie des Bundes

Tau dei dörtigjöhrig Geschicht von’n „Bund Niederdeutscher Autoren“ ‒ 1990 – 2020

För dörtig Johr an’n 22. Februar 1990 is dei „Bund Niederdeutscher Autoren“ (BNA) – för Mäkelborg-Vörpommern und dei Uckermark – gründ worden un wier dormit dei ierst nah dei Wend nieg gründ Plattdütsch-Verein in uns’ Bundesland. 

Dei Idee einen Plattschriewerbund in’t Läwen tau ropen, harr Gerhard Diekelmann† ut Verchen. Wat’s dat för’n Kierl wäst, dei up so’n Idee kamen is? Gerd Diekelmann füng all 1946 mit dei Schriewerie an. Dei kriggt em mit dei Tiet so tau faten, dat hei 1979 sien Daun as Fischer an’n Nagel hängen un statt mit Netten un Boot nu mit Bliefedder un Popier tau Wark gahn ded, dat heit, af 1980 nömt hei sick „Freier Schriftsteller“. Wat hei mit sien nieg Handwarkstüg makt, hett Hand un Faut. Sien Bäuker sünd bald vergräpen! Dei Ursak dorför is fix funn’n: Gerd Diekelmann schriwt oewer Minschen, dei üm em rüm läwen. Wat hei denn’ Läser vörsetten deit, is nich ut dei Luft gräpen, sonnern hett ein real Grundlag. Dortau kümmt, dat hei ein Plattdütsch schriwt, wat dei Lüd ok läsen könn’n! Tau so einen hebben anner Autoren vertrugen un dorüm hett hei dat ok fardig krägen, bekannte Plattschriewer von sien Idee tau oewertügen un sei in’t Schriewerboot tau halen. As hei 1990 denn’ BNA gründ, sitten all acht Autoren mit em an’n Disch. Tau dei ierst Johresversammlung, dei an’n 1. September 1990 up dei Tetrowsch Burgwallinsel afhollen würd, kemen all 22 Mitglieder. Dorbi wiern namhafte Autoren as Ilse Kletzin† (Ueckermünn), Günter Schmedemann†(Templin), Jürgen Pump (Kirchdörp, Insel Poel), August Wulf†  (Grot Godems), Heinz Pantzier† (Rostock), Ilse Mühlbach† (Doberan) orer Karl-Hermann Finck† (Laag). Dat Protokoll von disse Johresversammlung giwt uns Utkunft, weckern dei Mitglieder in’n iersten BNA-Vörstand wählt hebben: Gerhard Diekelmann (Verchen), Vörsitter, Heinz Vollmann† (Dargun), Schatzmeister un Ernst Grüttmüller† (Niebramborg), Organisation. Un kein anner, as Erna Taege-Rönisch† ut Templin, dei tau dei Gründungsmitglieder von’n BNA hürte un ok up’n Burgwall mitbi wier, is dunnmals as Ehrenvörsitter von denn’ niegen Schriewerbund wählt worden! Beschlaten würd in’n September 1990 ok dei Satzung von’n BNA un dormit würden dei Upgawen von denn’ Schriewerbund fastschräwen: „Die zukünftige Arbeit des Bundes muss sein, durch Kurzgeschichten, Gedichte und andere Prosaarbeiten in Niederdeutsch zur Bereicherung und Pflege der niederdeutschen Sprache beizutragen. Geplant ist später die Herausgabe einer Anthologie.“ Dormit wier dat Ziel in’t Og fat. Wenn ok bet hüt af un an eins an’t Visier dreiht worden is, üm dei ein orer anner Sak bäder in’n Focus tau kriegen, dei Marschrichtung von 1990 is ümmer Grundsatz von’n BNA bläben. 

All 1991 könn’n dei BNA-Schriewerslüd dat ierst Bauk von ehr Anthologie unner denn’ Namen „Plattdütsch Blaumen“ rutgäwen! Doroewer hett sick besonners Gerd Diekelmann freugt, man Koppweihdag hett em dat ok inbröcht, denn hei müsst dunnmals för denn’ Druck 9000 DM upbringen. Hei hett dat Geld tausamenkrägen, denn dei Vörsitter wier rührig. Hei hett nich blot Sponsoren funn’n, wiedere Autoren in’n Bund halt, nah Bauk I „Plattdütsch Blaumen“ dei Bäuker II bet V up’n Weg bröcht, sonnern dat Autoren-Schipp ok mit orrig ’n poor Lienen säker in’n Haben fast makt. So’n Lienen gew dat tau denn’ Landesheimatverband Mäkelborg-Vörpommern, tau anner Schriewerkrinks, Gesellschaften, Tiedingen unsowieder. 

Nah dei Gründungsversammlung up’n Burgwall bi Tetrow, fünnen tau Diekelmanns Amtstiet BNA Johres- un Wahlversammlungen in Dargun, Güstrow, Rostock, Stemhagen, Plau an’n See un up’n Pingelhoff bi Parchen statt.  

Wi hebben Gerd Diekelmann väl tau verdanken. Natürlich stünn’n em up dei Brügg gaude Stüerlüd tau Siet, oewer dei Kaptein wier hei un dat teigen Johr lang, von 1990 bet 2000!    

In’t Johr 2000 müsst Gerd Diekelmann, wieldat sien Gesundheit nich mihr mitspälen ded, denn’ Vörsitterposten afgäben. Un as dat sien Ort wier, hett hei dat mit Ümsicht dan un soans is dat denn’ niegen Vörsitter nich schwer follen dei Geschäfte tau oewernähmen un in Diekelmanns Fauttappen tau pedden. Dei Mitglieder wählten Wolfgang Mahnke (Rostock), dei mit Dieter Lockenvitz  (Berlin), Stellverträder un Apporten, Edeltraut Richter (Trittelwitz), Schatzmeister, Heidelinde Wulff (Rostock), Protokoll un Helmut Hillmann (Ueckermünn), Archiv, von 2000 bet 2012 denn’ BNA vörstünn. Mit Wolfgang Mahnke as Vörsitter is ok dei Sitz von’n „Bund Niederdeutscher Autoren“ e.V. ut Verchen för twölf Johr in dei Hansestadt Rostock halt worden. Mit väl Krasch hett Mahnke mit sien’n Vörstand up dei oll BNA-Grundmuer orrig ’n poor niege Stein sett un düchtig för denn’ Bund worben, dat bald all vierunviertig Autoren in’t Schriewer-Boot seten. Mit noch mihr Verbinnungen hett hei dat BNA-Schipp säkerer verankert, bispillswies tau’n Niederdeutsch-Beirat von’t Kultus-ministerium in Schwerin, tau Schriewerkrinks in’e Oll’n Bunneslänner, Tiedingen unsowieder un dordörch denn’ BNA oewer uns’ Lannesgrenzen weg bekannt makt. Mahnkes Verdeinst ist ok, dat hei dei beiden Lektoren, Anna-Margarete Zdrenka un Joachim Meier as ok denn’ Illustrator Uwe Gloede in’n Schriewerbund halt hett un dat hei dormit Qualität un Utseihn von „Plattdütsch Blaumen“ Bauk VI bet X, dei unner em as Baas up’n Markt kemen, up ein höger Stuft setten künn.    

Tau Besonnerheiten in Mahnkes Amtstiet tell’n „Dat plattdütsche Sextett“- söss BNA-Autoren deden ut ehr Bäuker up Johres- un Wahlversammlungen läsen, dei an ein Wochenend tau utsöcht Themen orer in ein besonners schön Gägend stattfünn’n. Dorbi würd för’n BNA ok orrig Warbung makt, denn in’n Rundfunk un  in’e Tiedings wier tau läsen, wur dat Plattdütsche Sextett sienen Uptritt harr orer wur in uns’ Land dei Schriewerbund grad tagte un dat hei dor Sünnabends tau ein „Öffentlich Läsung“ – Autoren von’n BNA stell’n sick vör -inladen ded. An’n Sünndag fünn’n dei Exkursionen statt. Dorbi güng dat in Zingst üm dei Dichtersch von’n Darß, Martha Müller-Grählert, in Spornitz üm dei Lewitz, in Goldbarg üm John Brinckman, in Schorssow üm Gaudshüser un Schlösser, in Langen Brütz üm dei Schweriner Seenlandschaft un dat Waldglasmuseum, in Jürgensdörp üm Fritz Reuter un in Walkendörp un Woren üm Richard Wossidlo. Wiel ut Öllersgrünn weck von dei Mitglieder nich mihr up lange Reisen gahn künn’n, sünd dei Tagungen mit Oewernachtung un Utflug instellt worden. Dei BNA-Autoren kemen twors noch einmal in Niebramborg un Tetrow tausamen, oewer dornah würden dei BNA-Tagungen ümmer in’t Fritz-Reuter-Literaturmuseum in Stemhagen afholl’n. Dat Plattdütsche Sextett harr nah fief Johr utdeint, oewer ein „Relikt“ ut disse Tiet hürt bet hüt tau BNA-Versammlungen, dei „Öffentliche Läsung“. Siet 2012 is Wolfgang Mahnke Ehrenvörsitter von’n BNA. – 

As Mahnkes Nahfolger würd 2012 Dr. Behrend Böckmann (Kirch Rosin) wählt. 2013 läd Dr. Böckmann sien Amt as Vörsitter dal un künnigte ok sien Mitgliedschaft in’n BNA up.

Von 2014 bet 2018 hett Dr. Jürgen Rogge (Perleberg-Lübzow) as BNA-Vörsitter fungiert. Ok in’n Vörstand harr sick wat ännert: Bernd Lubs (Niebramborg) wier sien Stellverträder, Dieter Lockenvitz (Berlin), makte Protokoll un Apporten, Edeltraut Richter (Trittelwitz) wier Schatzmeister un Helmut Hillmann (Ueckermünn) för dat Archiv taustännig. Dr. Rogge hett mit sienen Vörstand dat niege Statut verbindlich makt, Verbinnungen, besonners tau dei Gillhoff-Gesellschaft faster knüppt un denn niegen Sitz Perleberg-Lübzow in’t Vereinsregister in Neuruppin indragen laten un so dei taukünftig BNA-Marschrichtungen fast in’t Og fatt. Mit dei Rutgaw von „Plattdütsch Blaumen“, Bauk XI, XII un XIII, hett Dr. Rogge dei BNA-Tradition wohrt un denn’ Plattschriewerbund up Kurs hollen, obschonst dei Mitgliedertahlen dörch dat hoge Öller von dei Autoren trüchgahn sünd.

Siet 2018 is Bernd Lubs (Niebramborg) Vörsitter von’n BNA. Dei Vörstand is lütter worden un besteiht näben Bernd Lubs blot noch ut sien’n Stellverträder Dr. Jürgen Rogge (Perleberg-Lübzow) un denn Schatzmeister Norbert Schröder (Damerow). Kommissarisch gahn den‘n Vörstand tau Siet: Johannes Güssmer (Jabel), de sik üm dat Archiv kümmern sall, un Hanns-Eckard Sternberg (Wandlitz), dei den’n Schriftführer maken deit un för dei „Apporten“taustännig is. Wenn ok dei Mitgliedertahl wedder ’n bäten anstägen is – sei is wedder oewer dörtig ankamen –, ward dat dei niege Vörstand ahn dei Erfohrung von männigweck Mitglieder, dei unsen Bund intwüschen för ümmer verlaten hebben, nich licht hebben.Liekers fählt dat denn’ niegen Vörstand nich an Kraasch un gaude Ideen, wat uns sien „Gesellenstück“, dei Rutgaw von’t Jubiläumsbauk XIV, „Plattdütsch Blaumen“, tau uns’ dörtigjöhrig Bestahn wiest! –  

Nu künn’n je denken, dat von dei ierst BNA-Versammlung, dunnmals up dat Eiland in’n Tetrowschen See, keinein wat mitkrägen hett. Nee, gew naug Lüd in Mäkelborg-Vörpommern, dei von wüssten un mit ehr Grußadressen denn’ „Bund Niederdeutscher Autoren“ ein grot Taukunft wünschten, so ok Dr. Arnold Hückstädt (Malchin), tau dei Tiet Direkter von’t Fritz-Reuter-Literaturmuseum in Stemhagen. Dei Wünsch sünd in Erfüllung gahn, denn dei Geschicht von’n BNA is dörch siene flietigen Mitglieder, Vörstänn un Vörsitter, in’n Rahmen von Heimatpläg un Volkskultur in Mäkelborg-Vörpommern, wohrhaf-tig tau ein Erfolgsgeschicht worden. Dorbi spält dei BNA-Anthologie ein grot Rull. 1991 leg Bauk I up’n Disch, nu, 2020, sünd wi all bi Bauk XIV ankamen. Dei „Plattdütsch Blaumen“ sünd ümmer dat Paradepierd un Uthängeschild von’n BNA wäst. Dormit dei Bäuker von disse Anthologie ok in’t Og fall’n, hebben dei Taustännigen groten Wiert up dat Utseihn leggt. All Bauk I is mit Scherenschnitte utstaffiert, dei Anneliese Hoffmann (Horst) anfardigt hett. Dei Vignetten in Bauk II stammen von Karl-Hermann Finck (Laage). Mit Teiknungen von Annemarie Röpke (Insel Poel) schmückt sick Bauk III. Bauk IV hebben Annemarie Röpke un Karl-Hermann Finck mit Teiknungen illustriert. In Bauk V bet Bauk VII sünd wedder Scherenschnitte tau finn’n, ditmal von Rosel Pantzier† (Templin). Von Bauk VIII bet Bauk XIV hett Uwe Gloede (Insel Poel) dat Illustrier’n oewernahmen. Tau Freud von Autoren un Läser hebben all dei Scherenschnitte, Vignetten orer Teiknungen ümmer einen Betog tau dei Riemels orer Vertellers, wat dei „Plattdütsch Blaumen“ nich blot läsens- sonnern ok ankiekenswiert maken! Apropos läsenswiert. Von Bauk I bet V hebben dei Vörstandsmitglieder dei enzelnen Bidräg utwählt un, wenn’t nödig wier, ok Korrekturen vörschlagen. Üm denn Vörstand bi disse Arbeid tau entlasten, sünd af 1998 dei BNA-Mitglieder in Arbeitsgruppen updeilt worden: AG Greifswald, Leiter Dr. Kurt Wulf; AG Rostock, Leiter W. Mahnke; AG Schwerin, Leiter Rolf Holst un AG Uckermark, Leiter Günter Schmedemann. In disse Arbeitsgruppen würden dei enzelnen „Plattdütsch Blaumen“-Bidräg von ehr Autoren vördragen, je nah Qualität utwählt un dornah denn’ Vörstand tau’n Druck vörschlagen. As von Bauk VI an disse Upgaw in dei Hänn von Lektoren leggt würd, harrn dei Arbeitsgruppen utdeint, liekers hebben sei noch langen Tiet bestahn, nu, üm Erfohrungen uttautuschen. 

Dei Schriewerbund kann up sien Anthologie, dat sünd bet hüt 2.300 Sieden plattdütsche Literatur, mit Recht stolt sin, denn alle twei Johr ein nieg Bauk ruttaugäwen, dat hett bether noch kein anner Plattdütschverein in Mäkelborg-Vörpommern fardig krägen! Sall oewer ok seggt warden, dat dat Kultusministerium in Schwerin denn’ BNA dorbi mihrst finanziell unner dei Arm gräpen hett. So’n Hülp kem ok von dei Stiftung Mäkelborg in Schwerin, denn’ Förderverein Reutermuseen in Stemhagen un dat Volkskulturinstitut in Rostock. –   

Dei BNA konzentrierte sick oewer nich blot up sien Anthologie, hei hett väle Verbinnungen tau anner Vereine orer Institutionen knüppt, so tau: Denn’ ollen un niegen Heimatverband Mäkelborg-Vörpommern in Schwerin, Fritz Reuter Literaturmuseum in Stemhagen, Fritz-Reuter-Gesellschaft in Niebramborg, John Brinckman Gesellschaft in Jürgensdörp, Johannes-Gillhoff-Gesellschaft in Glaisin, Volkskulturinstitut in Rostock un tau Redaktionen von Schriften un Bläder, dei plattdütsche Texte drucken, in uns’ Bundesland oewer ok in Hamborg un Schleswig-Holstein. BNA-Autoren sünd Stammschriewer för: „heimathefte“, „kikut“, „Voß un Haas-Klenner“, „Mecklenburg-Magazin“, „Ostsee-Zeitung“, „Norddeutsche Neueste Nachrichten“, „Schweriner Volkszeitung“, „Nordkurier“, „Plattnet.de“, „Quickborn“ un„Lübecker Nachrichten“. Ok bi all dei groten Platt-Events, as bispillswies dei „ReuterFestspiele“ in Stemhagen orer dei „Norddeutschen Tage an der Elbe“ in Döms, maken Schriewerslüd von unsen BNA nich blot mit, sonnern gäben tietwies sogor denn’ Ton mit an. Dortau kamen noch Johr för Johr landup, landaf an 150 Läsungen, wenn BNA-Autoren ut ehr Anthologie orer ehr intwüschen mihr as einhunnertföftig sülben schräwen Bäuker vördrägendaun. 

„Die Pflege der niederdeutschen Sprache“ heit för BNA-Mitglieder tau’n Bispill oewer ok: Mitarbeit in’n „Förderverein un Kuratorium Reutermuseen“, bi „Platt-dütsch-Wettbewarbe in’e Schaul“, in’t Kultusministerium Mäkelborg-Vörpommern an’n Disch von’n „Niederdeutschbeirat“ orer ok wat in eigen Sak tau daun, wenn dei Lektoren Zdrenka un Meier dei BNA-Schriewerslüd in dei jöhrlichen „Schriew ick orrig Platt?“-Lihrstunn, ok „Plattdütsch-Warkstäd“ nömt, up’n Tähn fäuhlen. Tweimal in’t Johr kriegen dei BNA-Mitglieder oewer dei „Apporten“, dat Mitdeilungsblatt von’n BNA, dat Niegst ut dei Platt-Welt tau weiten. Intwüschen kickt dei BNA ok oewern Töllerrand un hett gaude Verbin-nungen tau Plattspräker un Plattschriewer in uns’ Nahwerlänner.

För dei hoge Qualität von ehr Vertellers, Riemels un Bäuker un för dei grote Mäuh un flietige Arbeit bi dei Pläg von uns’ Muddersprak, hebben orrig ’n poor BNA-Mitglieder Priese un Utteiknungen krägen. Babenan Ilse Mühlbach†  (Doberan), dei 2009 för ehr plattdütsches Läwenswark mit dat „Bundesverdienstkreuz“ ihrt un Erna Taege-Rönisch† (Templin), dei 1992 mit denn’ Hamborger „Fritz-Reuter-Pries“ utteikend würd. Denn’ „Fritz-Reuter-Literaturpries“ kregen 2003 Wolfgang Mahnke (Rostock), 2008 Dietrich Sabban  (Ludwigslust) un 2009 Heinz Pantzier† (Templin). Denn’ „Johannes-Gillhoff-Literaturpries“ kregen 2008 Karl-Heinz Madauss (Parchim), 2012 Dr. Jürgen Rogge (Perleberg-Lübzow), 2013 Dietrich Sabban (Ludwigslust), 2014 Jürgen Pump (Kirchdörp/Insel Poel) un 2018 Wolfgang Mahnke (Rostock).Mit denn’ Lannessprakpries von Mäkelborg-Vörpommern würd 2017 Wolfgang Mahnke (Rostock) utteikend. Besonners stolt sünd dei Schriewerslüd von’n BNA dor up, dat sei 2011 mit denn’ „Fritz-Reuter-Literaturpries“ utteikent worden sünd un twors för Bauk X von ehr Anthologie „Plattdütsch Blaumen“, wat up denn’ 200. Geburtsdag von Fritz Reuter tauschnäden wier. Wi willn uns je nich besonners rutstrieken, man kein anner Plattdütsch-Verein in Mäkelborg-Vörpommern kann so ein Utteiknungslist vörwiesen! 

Dat heit, uns’ Plattschriewerbund wier un is up einen gauden Weg un stüert dorüm säker up dat nehgst Jubiläum tau! Woher nähm ick disse Gewissheit?  

Wi harrn un hebben in unsen BNA gaude Vörsitter, Vörstandsmitglieder un flietige Autoren. Kieken S’, Vereinsvörsitter sünd dei Kapteins. Oewer ahn plietsche Stüerlüd up dei Brügg un flietig Maaten an Deck könn’n sei ehr Schipp nich unner Damp holl’n un ok nich säker dörch dei Krisenklippen stüern! Ick müsst hier nu dei Namen von väle Vereinsmitglieder uptell’n, dei in dei dörtig Johr BNA grotorrige Arbeid makt hebben. Nähmen S’ mi dat nich oewel, wenn’k blot twei dorvon an disse Stell nöm: Edeltraut Richter, siet 2018 Ehrenmitglied in’n Schriewerbund, dei länger as kein anner BNA-Schatzmeister wier, un Dieter Lockenvitz, dei mit groten Upwand denn’ Druck von uns’ „Plattdütsch Blaumen“, Bäuker VII bet XIV, bi denn’ Schibri-Verlag organisiert un tweimal Johr för Johr uns’ BNA-Vereinsnahrichten, dei „Apporten“, rutgäben hett!

Wi könn’n mit Stolt un Freud up dörtig Johr BNA trüchkieken. Oewer ok Weihmäudigkeit schlickt sick mit in, denn männigein von uns’ BNA-Autoren, mit dei wi orrig ’n Wegstück tausamen gahn sünd, hebben ehr Schriewtüg all för ümmer bisiet leggt. Dat sei in dat Jubiläumsbauk XIV noch eins tau Wurt kamen, is uns’ Bidrag dortau, dat dei Erinnerung an sei wak hollen ward!

Dei dörtig Johr Bund Niederdeutscher Autoren sünd ein Erfolgsgeschicht, wieldat starke, kreative Schriewerslüd dat BNA-Stüerad ünmmer fast in’e Hand harrn un mit ehr niemodsche Literatur dorför sorgt hebben, dat Plattdütsch in uns’ Land ok taukünftig ein wichtig Kulturgaut bliwt! Bliwt tau hoffen, dat dei Krasch bi’t Schriewen, Läsen orer in’t Ehrenamt in’n BNA nich nahlett un dat ok in dei taukamenden Johren noch orrig ’n poor niege Bäuker von dei Anthologie „Plattdütsch Blaumen“ up’n Markt kamen!                        

                                                                                   ​Wolfgang Mahnke

                                                                                   ​Ehrenvörsitter BNA